Como e cando comezaron as Festas do Carme en Vilaxoán?

As Festas da Virxe do Carme son unha das tradicións máis queridas e significativas do noso pobo. Este ano, 2025, celebramos 108 anos desde a primeira edición oficial. A súa orixe está ligada á fonda devoción da comunidade mariñeira cara á súa patroa, a Virxe do Carme. Vilaxoán foi sempre un lugar profundamente vencellado ao mar, e esa identidade reflíctese nas festas. A primeira celebración naceu do desexo de agradecer protección e amparo para as xentes do mar, e con ese mesmo espírito seguen hoxe.

Dende entón, as festas foron medrando, pero sen perder a súa esencia. Hai xeracións enteiras que colaboraron para mantelas, sempre coa mesma ilusión. E hoxe podemos dicir que son un orgullo colectivo, unha festa que representa o noso carácter, a nosa historia e sentimento de comunidade.

En que datas se celebran?

Cada ano celébranse na primeira fin de semana posterior ao 16 de xullo, que é o día da Virxe do Carme no calendario relixioso. Isto permite que os actos litúrxicos estean preto da data da patroa, pero que tamén se aproveite a fin de semana para organizar actividades para toda a veciñanza e visitantes. En 2025, desenvolveranse entre o 19 e o 21 de xullo, e agardamos que, coma sempre, sexan tres días de reencontros, alegría e participación.

Que actividades hai nas festas?

O programa é amplo e pensado para todos os públicos. A música é un dos piares principais: pasarrúas, charangas, actuacións de grupos locais e grandes orquestras en verbena. Tamén hai espazo para a tradición e o folclore, coas gaitas, as corais e o evento Vilaxoán Canta, que pon en valor a música da zona. A parte relixiosa segue a ter moita importancia, con misas solemnes e cantadas, e moi especialmente coa procesión marítima do domingo, na que a imaxe da Virxe percorre o mar acompañada por embarcacións engalanadas. É un dos momentos máis emotivos das festas. Este ano tamén recuperamos unha tradición moi querida: a sardiñada popular do sábado, un acto festivo, gastronómico e social que durante moitos anos foi símbolo de convivencia. Non faltarán as actividades infantís, xogos populares, atraccións e outras propostas para que toda a familia goce das festas.

Que novidades hai nesta edición?

Ademais da recuperación da sardiñada, estamos a mellorar aspectos organizativos como a limpeza, a seguridade, o acceso á información dos eventos e a distribución dos espazos. Queremos que a xente se sinta cómoda, segura e informada. Todo isto facémolo con medios limitados, pero con moito esforzo e dedicación.





Como está formada a nova Comisión de Festas?

A actual comisión está composta por un grupo de mozos e mozas que, malia ter responsabilidades persoais, familiares e laborais, decidimos poñernos ao fronte desta tarefa. Organizamos reunións, buscamos financiamento, xestionamos provedores, organizamos rifas, deseñamos o cartel… Todo de forma voluntaria e con moita ilusión. Sabemos que organizar unhas festas así non é sinxelo, pero tamén é moi gratificante. Ver a xente disfrutar, ver como se enche Vilaxoán de vida, compensa todo o esforzo.

Como vedes o futuro destas festas?

O principal é garantir que as festas se celebren cada ano. Queremos que sigan sendo participativas, abertas e con identidade propia. Co paso do tempo, esperamos seguir mellorando: ampliar programación, contar con máis apoios, implicar máis colectivos... Temos claro que o futuro depende do relevo xeracional e do apoio da veciñanza. Pero en Vilaxoán hai moito amor polas festas, e mentres iso exista, o futuro estará garantido. Estamos orgullosos do camiño feito e con ganas de seguir celebrando moitos anos máis.