Falamos con Alejandro Piñeiro, vicepresidente da Asociación Amigos da Dorna de Portonovo

- Cando naceu a asociación e con qué obxectivo?

Este mes de decembro cumprimos precisamente vinte e cinco anos, co obxectivo de recuperar as actividades da cultura mariñeira en xeral, aínda que co tempo fomos orientando máis cara á recuperación de embarcacións e navegación.

- Calquera pode aprender a navegar convosco?

Si, por suposto. Somos unha asociación pública, aberta a calquera persoa. Damos cursos de navegación, saídas en dorna, tamén facemos unha regata todos os anos, que serve para darnos maior visibilidade.

- Como ves o percorrido da asociación ao longo destes vinte e cinco anos? Vaise incorporando máis xente?

Neste tempo mantemos un número regular de socios que vira ao redor de cen. Nótase interese pola navegación tradicional, aínda que pensamos que é necesario unha maior proxección, darnos a coñecer aínda máis para que a xente saiba que estamos aí e se interese por este mundo, por este legado cultural.

- Como facedes para que se vos coñeza tamén fóra de Portonovo e do concello, para que máis persoas saiban da asociación?

Pertencemos a unha federación que é Culturmar, a Federación Galega pola Cultura Marítima e Fluvial, na que estamos integradas unhas corenta asociacións que nos dedicamos ao mesmo ámbito. E aínda que nós estamos enfocados no concello de Sanxenxo e na ría de Pontevedra, tamén participamos en actividades por Galicia e mesmo fóra.

- Que plantexamentos de futuro tedes, especialmente fronte ao 2023?

Pretendemos que sexa un ano importante pola celebración do 25 aniversario, que o imos a conmemorar como se merece. Neste plantexamento están os cursos e a escola de navegación.

- Ides celebralo ao longo de todo o ano?

Si, aínda que os 25 anos os cumprimos o 7 de decembro do 22, este momento do inverno non é o mellor para facer actividades, así que pretendemos celebralo especialmente durante a primavera e o verán de 2023.

- Xa sabedes que actividades ides poñer en marcha para conmemorar o aniversario?

Unha delas é a posta a punto da embarcación coa cal empezaron os socios fundadores, a dorna “Jatiña”. Temos en perspectiva metela nun estaleiro para realizarlle algunhas reparacións e poñela ó día. Por outra banda, faremos unha regata, que será a décimo cuarta Regata do Sepelo, que forma parte do calendario de concentracións de embarcacións tradicionais que se promove dende a Federación Galega pola Cultura Marítima e Fluvial. E tamén queremos seguir coa escola de navegación co apoio do Concello.