Falamos con María José Cacabelos, presidenta de Guimatur, a Asociación Cultural Mulleres do Mar de Cambados, sobre a traxectoria que viviu a entidade dende a súa fundación e as actividades que levan a cabo.

Cando comezou a súa actividade a Asociación?

Comezamos no ano 2004 coa actividade de turismo mariñeiro. Xurdiu a raíz duns cursos de formación para axentes dinamizadores do medio mariño que estaban subvencionados por fondos europeos e que foron convocados polo Concello de Cambados e a Cofradía de Pescadores San Antonio de Cambados. Nestes cursos formáronnos a varias de nós para falar en público, explicáronnos cousas da bioloxía mariña, etc. E en xullo de ese mesmo ano comezamos a facer unha ruta de marisqueo, así como a visita ao porto.

Como foi a evolución da Asociación?

A realidade é que, nos primeiros anos, non eramos moi coñecidas. Mais, pouco a pouco, grazas ao boca a boca e á nosa participación en feiras de turismo, entre outras cousas, fúmonos dando a coñecer. Na actualidade colaboramos con diferentes empresas da zona, como adegas ou conserveiras, para crear sinerxías e que, cando os turistas veñen a Cambados, teñan actividades que facer e poidan coñecer a fondo a realidade dunha vila mariñeira como a nosa. A día de hoxe, non coñezo a ninguén que viñera e non llo recomendara despois a coñecidos e familiares, polo que a acollida é moi boa.

En que consisten as actividades que levades a cabo?

A principal é a ruta de marisqueo, que se fai dependendo de cando sexa a baixamar, pois non sempre é á mesma hora. O primeiro que facemos é unha ruta polo barrio mariñeiro de Cambados. Despois, poñemos as botas e baixamos á praia. Aí lles explicamos todo o relacionado co noso traballo, dende o proceso da extracción ata a comercialización. A continuación eles mesmos teñen a posibilidade de probar o que é mariscar, mais sempre volvemos sementar o que recollen. Outra das actividades principais é o roteiro do porto. Nel facemos unha explicación de como funciona a lonxa. Antes entrábamos á poxa, mais coa situación actual agora visitamos a lonxa antes e despois observamos dende fora como se vai desenvolvendo. A continuación facemos un pequeno percorrido polo porto de Tragove. Alí explicamos os diferentes tipos de embarcacións, as artes de pesca e as especies que se capturan. Ademais, centrámonos en comunicarlles como se desenvolve o traballo das redeiras, pois algunhas delas tamén forman parte de asociación. Isto se pode completar cunha visita a unha adega, a unha conserveira ou similar. É darlles unha alternativa para que queden o día completo en Cambados.

Cal é a situación actual da Asociación?

Na actualidade está formada por 12 mulleres mariscadoras e redeiras. Ao principio eramos 19 mais, nestes anos, algunhas se xubilaron, outras tiñan complicado compatibilizar a vida familiar, laboral e a asociación, etc. Incorporamos a catro membros novos hai un par de anos e estamos vendo a posibilidade de que se apunte algunha compañeira máis.