Falamos con Leonor Muñiz, presidenta da asociación:

Como e cando comezou o proxecto da Asociación?

Esta asociación naceu alá polos anos 90, cando eramos unhas adolescentes que pouco caso facíamos a este tipo de cousas. Eu, persoalmente, marchei a traballar ás Canarias durante bastantes anos e, á volta, a pesar de que a miña familia rexentara toda a vida un bar e unha tenda de barrio, decateime da perda de contacto que tiña coa xente do meu pobo.

Tras instalarme de novo en Cambados, nacer o meu fillo e retomar a vida laboral aquí, foi cando souben que aquela asociación que nacera nos anos 90 levaba uns poucos anos inactiva por falta de directiva que a puxera en marcha. Estamos a principios do ano 2014, e foi nese momento cando a insistencia da miña cuñada, irmá do meu home, me animou a intentar recuperala.

Simplemente fixemos unha reunión para ver se había interese en rescatar a asociación ou non. Xa naquela reunión presentáronse un montón de mulleres e, alí mesmo, a man alzada, xurdiron voluntariamente o resto dos seis membros da directiva, que a día de hoxe seguimos sendo as mesmas. Eu, Leonor, como presidenta; Elena, a miña cuñada, vicepresidenta; Eva, secretaria; Vanesa, tesoureira; e Yolanda e Carmela, vogais. Recentemente, hai xusto un mes, ampliamos a directiva con dúas novas vogais, María e Begoña, así que agora somos oito.

Cales son os servizos que desenvolvedes?

Os nosos estatutos indican que a nosa actividade está centrada na formación, lecer e entretemento das nosas socias e as súas familias. Ao longo de 10 anos, iso converteuse nun innumerable conxunto de cursos, charlas, obradoiros, actividades, etc.

Cursos que se manteñen ao longo dos anos: zumba, pilates, ioga, labores, costura, informática, pintura, memoria, horta, etc.

Cursos que se levaron a cabo: lingua de signos, dron, coiro, risoterapia, patchwork, scrapbooking, cestería, bixutaría, bailes de salón, flamenco, ximnasia de mantemento, manualidades, manipulador de alimentos, fitosanitarios, primeiros auxilios, etc.

Charlas e xornadas de todo tipo: ansiedade, cancro, leucemia, alzhéimer, uso de medicamentos, dano cerebral, educación viaria, redes sociais, etc.

Obradoiros: cata de viños, cociña, percuterapia, Nadal, reciclaxe, manualidades, entre outros.

Ademais, acudimos e participamos en moitos programas da TVG, festivais, feiras, colaboracións, etc.

Actividades fixas cada ano: dúas excursións culturais con visitas a proxectos galegos, unha andaina solidaria e saudable, unha cesta con produtos para sortear no Día da Nai, unha cea da socia, entre outras.

A que usuarios está máis enfocada a vosa actividade?

As nosas socias son mulleres cunha idade comprendida entre os 18 anos e os 80 e pico. Non necesariamente son do entorno rural nin exclusivamente de Castrelo, nin sequera só de Cambados, xa que temos socias de moitos concellos do Salnés.

As socias pertencen a diversos sectores: mar, agricultura, vitivinicultura, hostalaría, empresariado, estudantes, xubiladas, emprendedoras, persoas desempregadas, entre outros. Ademais, o seu entorno familiar tamén participa nas nosas actividades.

Cal é o obxectivo que vos marcades cando chega un novo usuario?

O máis importante é que se sinta parte desta familia que somos. A socialización é o máis demandado entre elas.

Cada unha, na súa medida, nas súas necesidades ou nos seus gustos, vai atopando nas nosas propostas algo que lle guste. Así, se non é unha actividade, será outra a que a enganche. Por iso, as nosas actividades alcanzan practicamente o 100 % das socias. Mulleres que inicialmente non se coñecían entre elas, tras participar nos cursos, forxan amizades e relacións duradeiras no tempo.

Como vedes o futuro da asociación?

En principio, a nosa vontade é seguir adiante. Proba disto é o recente aumento de membros na directiva para reaxustar o traballo que conleva xestionar unha asociación como esta.

As socias amósannos, a través da súa participación e tamén mediante mensaxes ou persoalmente, o seu agradecemento polo labor realizado.

Por iso, de momento, seguiremos mantendo as actividades e intentando innovar con outras para non caer na monotonía e ofrecerlles o que realmente demandan: socialización entre todas nós.