O Grupo de Danza O Castro nace no ano 2006 no seo da Asociación Cultural O Castro de Baión, inspirándose noutros grupos galegos e, en especial, no Ballet Rei de Viana, que fusionou o ballet clásico co baile tradicional galego.

Na actualidade O Castro está composto por 30 membros que forman tres seccións, infantil, xuvenil e sénior. O seu obxectivo é o de amosar unha danza alegre e desenfada, cun especial coidado na súa posta en escena. O seu repertorio abrangue dende muiñeiras, xotas e pandeiradas, inspiradas na música tradicional, ata composicións máis contemporáneas de música folk.

A súa paixón polo baile levounos a actuar ao longo de toda a comunidade galega, participando en festivais, intercambios culturais e galas benéficas.A día de hoxe atópanse inmersos nun novo proxecto escénico xunto aos grupos de música  tradicional da mesma asociación. Ademais, están preparando colaboracións con outros grupos de danza da comarca do Salnés.