No número anterior desta revista podes atopar a carta dirixida a alguén con depresión. Neste exemplar, esta carta é para ti que acompañas e coidas do teu ser querido. Eu, dende aquí, recoñezo o teu traballo e douche a miña felicitación máis sincera. Todas aquelas persoas que coidan a alguén con calquera tipo de enfermidade fan unha gran labor social.

A depresión é unha enfermidade mental que sofre non só a persoa diagnosticada, senón tamén o seu entorno. Acompañar e coidar a un ser querido con depresión é moi duro e agotador, e pode afectar o noso benestar psicolóxico e emocional.
Gustaríame que atoparas nestas liñas ideas e consellos útiles para facer o teu traballo máis doado.

Para coidar necesitamos primeiro coidarnos nós. Durmir ben, comer saudable, falar coas persoas que apreciamos e movernos diariamente. Elixe como mover o teu corpo: camiñar, nadar, facer ioga, pilates, traballar na túa horta ou xardín. Se ademais desfrutas de algún pasatempo, incorpórao á túa rutina diaria ou case diaria: ler, tocar un instrumento, facer repostería, ganchillo, pintura. O que ti elixas estará ben.

Incorporando estas rutinas sentirás a enerxía necesaria para acompañar o teu ser querido e para que faga as súas. É importante que a persoa enferma con depresión faga tamén as súas rutinas diarias. As rutinas aportan a estrutura necesaria para levar unha vida saudable.

A persoa con depresión necesita coidados e que a acompañen na súa enfermidade. Un doutor ou doutora en atención primaria pode ser o primeiro profesional que diagnostique a enfermidade; despois, na área de psiquiatría, poderán seguir acompañando na curación do paciente, e día a día ti na casa.

Estes son os puntos que destacaría para un bo coidado do paciente con depresión:

1 - O descanso é moi importante para todos nós, e en especial para calquera enfermo con enfermidade mental, como neste caso a depresión. Para un bo descanso hai psicofármacos que axudan a conciliar o sono e descansar toda a noite.

2 - É moi importante axudar ao teu ser querido con depresión a erguerse da cama polas mañás, poñer unha hora máxima para estar deitado (9, 10, 11 da mañá). E pola noite, establecer unha hora adecuada para deitarse tamén é importante.

3 - Axúdalle na súa hixiene persoal: ducharse, elexir a roupa para vestirse. Esta simple decisión pode custarlle á persoa con depresión.

4 - Activarse. Dar un pequeno paseo xuntos é moi bo para mover o corpo e preparar o sono. Expoñéndonos á luz do día pola mañá, comezaremos a fabricar melatonina para a noite.

5 - Tarefas do fogar. Pregúntalle que tarefa da casa podería facer. Se di que non é capaz, facédela xuntos. O resto de tarefas, citas médicas, dentista ou outras, que as faga, e ti séntate ó seu carón. Valida e felicita se completa algunha tarefa.

6 - Antes de marchar da casa, pregúntalle se está ben e se pode quedar só/soa.

7 - Escoita. Hai momentos en que nos aventuramos a dar consellos cando o que necesitan é sentirse escoitado/a.

8 - Pensamentos negativos en bucle. Síntoma moi frecuente na depresión. Pídelle que colla aire 5 segundos e solte en outros 5 segundos, facendo o mesmo xuntos durante uns minutos. Se quere, pode escribir nun papel algún deses pensamentos que repite na súa mente e logo romper o papel. Axuda tamén que nomee cousas fermosas que pasaron hoxe e que agradece. Por cada pensamento negativo, tres positivos. Non necesitamos vaciar a nosa cabeza dese pensamentos, senón distanciarnos deles sabendo que non son a realidade.

Son puntos importantes que espero che axuden. Ánimo! Os profesionais de saúde mental estaremos sempre dispoñibles para que vos apoiedes en nós. Xuntos poderemos atopar ese benestar mental e emocional para ti e para o teu ser querido.