O ano 1922 é unha data moi importante para a historia da Illa de Arousa, desas imposibles de esquecer e que, de aquí a cinco anos, será lembrada a modo de centenario. Non é para menos. Aquel foi o ano en que a veciñanza desta vila arousá fundou un equipo, o Céltiga F.C., que é ademais un dos máis veteranos de toda Galicia, se ben o equipo non se federou ata case 30 anos despois, xa entrada a década dos 50, cun plantel que estaba formado exclusivamente por xogadores locais.

Malia iso, falar de datas, no caso do Céltiga, ten o seu aquel de complicación. Moito máis se hai que establecer aniversarios. E é que ao pouco da súa federación o equipo desapareceu e no ano 60 naceu o Titanic intentando ocupar o seu lugar. Cun plantel de entre 13 e 18 anos, as circunstancias o “obrigaron” tamén a desaparecer cando aos seus integrantes lles tocou ir á Marina. Pero aquela experiencia non foi en balde: aqueles mozos foron, por así dicilo, a canteira dun novo e fortalecido Céltiga renacido das súas cinzas.

Desde entón o equipo da Illa, que ten como base o campo Salvador Otero con capacidade para arredor de 1.500 persoas –nada desprezable tendo en conta que A Illa conta con menos de 5.000 habitantes–, moveuse principalmente polo fútbol pontevedrés en rexional preferente sur e primeira rexional. Malia iso, tamén se ten deixado ver durante máis de dez temporadas, principalmente na década dos 80, en terceira división a nivel autonómico, na que tamén se atopou esta temporada.

Na actualidade, o Céltiga está composto por un total de 12 equipos: un en terceira división, un xuvenil, un cadete, un infantil, dous alevíns, dous benxamíns, dous pre-benxamíns e, por último, dous biberóns. Precisamente estas últimas catro categorías, de alevín a biberón, son as protagonistas do evento máis destacado que celebra o club, os seus famosos Torneos de Base –entre os meses de maio e xuño– que agrupan a equipos de toda Galicia (chegaron a participar máis de 30) no campo de herba natural sede desta formación.

Ademais, durante o mes de xullo organiza un campus de verán no que participan nenos e nenas vidas de toda a comarca. Esta especial atención á base non é casual, xa que precisamente un dos obxectivos principais do club é fortalecer os valores deportivos para todos os seus xogadores de base pois, como din desde a directiva, primeiro é necesario formalos como persoas e, posteriormente, como deportistas.

Con máis de 200 integrantes entre deportistas e equipo técnico e directivo, practicamente unha de cada 10 persoas que viven na Illa é socia do Céltiga F.C. (unhas 480 na actualidade). Esta é unha boa sinal do apego que as súas veciñas e veciños teñen por el e, por iso, a formación tivo durante esta temporada como gran obxectivo seguir un ano máis no grupo primeiro de terceira división. Despóis dun ano moi duro e de moito traballo conseguiron asegurarse o posto de permanencia na categoría. Un ano menos que chamar ás meigas.