Charanga Alambique é unha agrupación musical que naceu a finais do ano 2016 na provincia de Pontevedra. Aínda que se formou hai moi pouco (algo máis dun ano) co seu nome e o seu repertorio, o certo é que conta cun elenco de músicos que xa son veteranos e que suman todos eles moitas horas de romaría ás súas costas. Os seus compoñentes son charangueiros desde hai máis de dez anos, unha década que a pasaron percorrendo todas as boas festas e romarías da nosa terra. Por iso, son totalmente coñecedores das súas dinámicas e o seu desenvolvemento.

No seu repertorio mestúranse ritmos para todos os gustos: desde cumbias ata xotas e muiñeiras, pasando tamén por merengues, samba e tamén pasodobres. Pero, iso si: todas as súas cancións pasan pola adaptación aos ritmos propios dunha formación do seu estilo. Nos arranxos musicais de Alambique conviven éxitos de hai catro décadas e tamén as cancións que son éxitos na actualidade, música internacional e a máis tradicional galega. Malia a iso, consideran que a súa especialidade e o que máis lles gusta é axudar coa súa música, pero tamén co seu humor, a que a xente o pase ben con eles.

De feito, se crearon a Charanga Alambique foi porque non poucas persoas lles dixeron que “Sodes a caña!” Ante tantas palabras de ánimo, era lóxico que non lles quedara máis remedio que formar a charanga e ir percorrendo a xeografía galega destilando alegría e moito bo rollo.