Falamos cos responsables deste histórico club de baloncesto grovense, onde xeracións de “mecos” levan practicando o seu deporte favorito.

Como e cando se fundou o Club Baloncesto O Meco?

O Club Baloncesto O Meco naceu no ano 1999 coa intención de crear unha base sólida de baloncesto en O Grove. Desde o inicio, a súa actividade principal centrouse no desenvolvemento de programas deportivos, co obxectivo de fomentar o coñecemento, a formación e a participación entre os mozos, apoiándose nunha estrutura consolidada e na filosofía de promover o baloncesto desde a súa base.

A escola de baloncesto iniciou a súa actividade oficial na tempada 2000/2001, co único obxectivo de impulsar o deporte de base e ofrecer unha alternativa educativa válida no concello a través do baloncesto. Ao longo dos anos, contamos con varios adestradores formados no club, así como co apoio de xogadores das categorías superiores, que ano tras ano transmiten o seu coñecemento e cariño aos máis cativos. O club cre firmemente na educación a través do deporte, e o seu único interese é proporcionarlles o mellor aos cativos, valorándoos dentro do marco deste marabilloso deporte: o baloncesto.

Como foi a traxectoria do club desde a súa creación ata hoxe?

A tempada 2002/03 marcou o despegue do Meco. Foi o momento en que descubrimos que podiamos ser competitivos, e a partir de aí chegaron anos de grandes éxitos. 

Verbas de Anxo Cornes (fundador do clube):

"A tempada 2002/03 estivo repleta de éxitos, e necesitaba que a celebrásemos por todo o alto. Foi, penso, a primeira vez na que fixemos festa de fin de tempada con partidos de pais e nais, subida andando á Siradella e churrascada. Eran tempos de moita felicidade."

Na tempada 19/20, as seniors femininas iniciaron a liga fronte ao Colexio Apóstol Santiago en Vigo. Este equipo foi o primeiro senior feminino desta categoría no C.B. O Meco. Ademais, nesta tempada o clube contou con todas as categorías femininas e masculinas, desde babi ata senior, ata que a pandemia interrompeu a actividade.

Durante as tempadas 20/21 e 21/22, con moito esforzo, o club conseguiu seguir competindo e adestrando pese á situación do COVID. Na tempada 23/24, O Meco retomou equipos en todas as categorías, vivindo unha das mellores tempadas da súa historia.

Cal é a situación actual do club, tanto en equipos masculinos como femininos?

Na actualidade, o club non conta con ningún equipo senior. A prioridade segue sendo a estabilidade da cantera e dos equipos de base, que constitúen o corazón do proxecto. Mantemento de todos os equipos, incluídos os senior, require maior colaboración dos sectores públicos e privados para garantir a sustentabilidade. 

No masculino, contamos cun equipo junior de primeiro ano que está competindo activamente na liga, e a xeración masculina seguinte tamén mostra gran potencial. No feminino, a ambición do club é aumentar o número de licenzas e motivar ás nenas para que se incorporen ao baloncesto desde idades temperás.

Cales son os principais obxectivos do club de cara ao futuro?

Incrementar o número de licenzas femininas desde a base. Actualmente, hai poucas nenas de 1º a 4º de primaria, polo que se pretende fomentar a súa participación.

Formar un equipo senior masculino na próxima tempada e, se hai suficientes xogadoras, establecer un equipo junior ou senior feminino. A xeración de 2009 deixa un baleiro que podería cubrirse coa incorporación de rapazas de 2010 e de máis idade. O obxectivo é ofrecerlles equipo ás nenas que soben e animar a novas xogadoras a unirse ao club.