O piragüismo é o deporte por excelencia na Illa de Arousa. Non é de estrañar que nun territorio rodeado de mar e cun forte vínculo mariñeiro, o deporte con maior arraigo practíquese no mar. Moitos nenos da Illa nacen cunhas palas baixo o brazo, cun talento innato que se pon de manifesto nos éxitos do Club de Piragüismo Illa de Arousa.

O club naceu no ano 1982 baixo o nome do patrón da Illa: San Xulián. Durante este primeiro ano, funcionou sen adestrador e a súa participación en competición oficiais foi testemuñal. Por aquel entón non existía transporte terrestre á península, polo que os padexeiros acudían en barco de xeito esporádico para competir a nivel provincial.

Evolución e actualidade do club

Na tempada 1983/1984 o club xa contou co seu primeiro adestrador, momento no cal se comezaron a marcar uns obxectivos deportivos que deron como resultado dous trofeos a nivel individunal. Ademais, no ano 1985 se compite por primeira vez nun Campionato de España contando coa participación de dous padexeiros. No ano 1986 o club consegue o ascenso a 1ª División e empeza a levar cada vez máis participantes a competicións de gran calado nacional.

Despois duns anos, o club pasou a formar parte da Asociación Cultural Dorna, tendo autonomía propia pero contando coa súa axuda para recadar fondos. A partir de aquí o club empeza a centrarse en mellorar a súa estrutura como club coa adquisición dunhas instalacións deportivas e de mellores embarcacións.

Ao largo destes mais de 40 anos de historia numerosos deportistas que son membros da entidade proclamáronse Campións Nacionais e Autonómicos en diferentes modalidades, o que fixo que fosen incluídos na Selección Galega e Nacional, proclamándose algún deles campións do mundo.

Na actualidade, o club conta cunha boa xeración de grandes promesas do piragüismo. Os resultados en canto a medallas son realmente satisfactorios e hai rapaces con moitas opcións de entrar no centro de tecnificación. En definitiva, dispón dunha boa canteira que garantirá os éxitos do club a nivel competitivo. Nestes momentos, o club conta con arredor de 90 licencias activas.

O futuro da entidade a nivel deportivo e financieiro

Non obstante, o club terá que facer fronte a novos obstáculos que nada teñen que ver co ámbito deportivo. A nivel económico, o futuro preséntase moito menos alentador para o Club de Piragüismo Illa de Arousa, especialmente a raíz da crises do coronavirus.

Durante este tempo de confinamento e convivencia co virus, os deportistas foron capaces de manter o seu rendemento grazas ao entreno en casa. As condicións climáticas da Illa, onde son frecuentes os fortes ventos que impiden a práctica no mar, fan que o club dispoña de ergómetros para adestrar en terra. Deste xeito, a entidade distribuíu as máquinas e material de ximnasio (pesas, gomas...) xunto cun programa de entreno para que os rapaces non perdesen o ritmo de adestramento. Co fin do confinamento e o reinicio dos entrenamentos, os piragüistas volveron case a súa actividade normal. Ao tratarse du deporte individual, sen contacto e ao aire libre tiveron unha volta moito menos problemática que outros deportistas.

Neste sentido, o impacto do coronavirus foi menor, pero a nivel económico a incertidumbre aumenta a froito da pandemia. O club finánciase basicamente grazas as subvencións administrativas e as festas gastronómicas que serven para recadar fondos e que, este ano, non puideron realizarse. A directiva presidida por Arturo Paz Dios teme que a crises sanitaria provoque recortes no ámbito cultural e deportivo que comprometan a supervivencia do club.