Falamos con Carlos Chaves, directivo do Clube Xadrez Dorna para coñecer un pouco máis sobre esta entidade situada na Illa de Arousa.

Como e cando foi a fundación do clube?

O clube fundouse no ano 1985 coa chegada da ponte e foi o resultado da paixón dun grupo de amigos polo xadrez e que pertencían á Asociación Cultural Dorna, entre eles podemos destacar a Jose Manuel Ramos Pillado, Wenceslao Chaves ou Luís Rial entre outros, tras xogar de forma regular partidas de forma individual, comezaron a organizar torneos sociais na illa.

Como foi á súa traxectoria ata este momento?

O equipo comezou a competir nas ligas zonais e algún dos nosos xogadores competían pata clasificarse noutras ligas superiores. Xa nos anos noventa creouse a Escola de Xadrez e a partir de aí xa se crearon equipos estruturados e ligas por divisións, había desde equipos infantís ata de veteranos, os artífices da escola foron os cabezas do clube naquela época Pillado e a súa man dereita José Manuel Divos Divos. Pero no ano 2002 o club paralizou a súa actividade debido á falta de xogadores por compromisos e estudos. Tras esta paréntese, no ano 2013, retómase a actividade do Club Xadrez Dorna recuperando xogadores que foran a xogar a outros clubes da zona e participando durante eses anos nas diferentes ligas de clubes. De novo retoma a súa actividade a escola e comezan a organizarse torneos no verán onde chegaron a participar ata oitenta persoas.

Como é a situación actual do clube?

Nestes momentos o clube está nunha situación moi boa, sen contar as limitacións que vivimos polo Covid, temos unha vintena de xogadores federados e dous equipos en competición, un en primeira e outro en segunda división da Federación Galega de Xadrez. A Escola de Xadrez funciona de forma regular durante o curso e organízanse os torneos de verán en anos con situación normal, este ano lamentablemente non se farán por seguridade.

Cales son os obxectivos no futuro?

Como obxectivos poderiamos dicir que son asentar os equipos da escola, e se pode ser impulsala para que siga crecendo, continuar coas actividades que desenvolvemos e manter o nivel tanto de xogo como de formación para que o futuro siga sendo prometedor.