Domingo Tabuyo escribe poesía dende moi novo e, dende que a descubriu, esta linguaxe quedou nel para sempre. Mentres estudaba na Universidade de Santiago entrou en contacto con persoas de inquedanzas similares e comezou a gañar  premios por poemas soltos. De aí pasou aos seus poemarios, relacionouse con diversos colectivos e comezou a publicar obras e en revistas literarias galegas e portuguesas.

Encádrase na Poesía de Experiencia, cunha clara influencia culturalista e unha temática onde amor e desamor ocupan un espazo importante, sen esquecer referencias sociais e, ás veces, desencanto e anguria.

Entre os seus premios resaltan o accésit do González Garcés da Deputación coruñesa, o Premio Cidade de Ourense ou o Avelina Valladares, da Estrada. Tamén a novela tivo un grande espazo na súa liña creativa, con novelas como “Carmín”, “Svea Kott” ou “Viaxe de Vionta”. Na actualidade ten varios proxectos de novela xuvenil e de poesía que, agarda, poidan ver a luz en breve.