Ghesgha é un proxecto musical concibido no ano 2014 baixo o nome de Killing Floor. Naquela época o grupo movíase polos xéneros do hard rock e do blues instrumental, pero co paso do tempo os seus membros foron buscando novos sons e incorporando distintos instrumentos, como o sintetizador ou o bombardino. Foi dous anos despois cando consideraron que o seu novo estilo debía traducirse nun novo nome e escolleron Ghesgha, dentro do seu afán de buscar algo distinto e diferenciador.

Na súa nova etapa, Ghesgha bebe da influencia dos grandes grupos progresivos da década dos 70, como son King Crimson, Pink Floyd, Camel, Van Der Graaf Generator, Frank Zappa ou E.L.P., entre outros. Coa súa influencia, Ghesgha creou un estilo propio, único e característico, sempre en constante evolución e exploración e coa improvisación como o piar fundamental para as súas actuacións en directo, da man da tradición do jazz fusión. Fixáronse en formacións como a Mahavishnu Orchestra, Return to Forever ou One Shot para que todas as súas accións sexan irrepetibles.

Nos seus directos, polo tanto, crean auténticos rituais  sonoros e instrumentais onde todos os seus membros o dan todo de si mesmos: tanto Xosé V. Outón, á guitarra, como o batería Gabriel González, o baixo Daniel M. Vázquez e tamén Adrián Chaves, encargado dos teclados, o sintetizador e o  bombardino. Ata a data teñen unha maqueta gravada en 2016, ao abeiro do premio do concurso “Píntao de rock”, pero a súa idea é volver gravar novo material este mesmo verán.