Alecrín conta cunha grande traxectoria que se remonta ao ano 1995, cando comezaron coas súas representacións teatrais despois de que o concello de Ribadumia apostase pola creación dunha escola de interpretación municipal. Este espazo deu como resultado o proxecto Alecrín que, malia que comezou con soamente seis integrantes, na actualidade dobra o seu elenco e suma xa doce membros.

As obras escollidas por Alecrín mesturan drama e comedia, e adoitan ter un papel protagonista moi marcado: o mundo rural.
Cada ano realizan arredor de dez títulos que os levan a  percorrer as comarcas da provincia de Pontevedra, podendo chegar ás veciñas e veciños de Mourente, Tui, Campo Lameiro, Poio, Sanxenxo ou Cambados, por citar unhas cantas vilas.

En 2016 levaron a cabo o seu proxecto máis ambicioso: a rodaxe dun filme amateur. “O fillo de Manuel” é a adaptación da obra teatral de mesmo nome e rodouse ao longo da comarca do Salnés. O filme estivo dirixido por José Rodríguez Carro, natural de Cambados, pero para poder ver a luz necesitou da colaboración dun grande número de persoas. O resultado pódese ver na súa totalidade a través de YouTube.

Convertido nunha asociación cultural desde o ano 2005, o principal obxectivo de futuro de Alecrín é seguir expandíndose por todo o territorio galego para conseguir que cada vez máis xente se afeccione ao teatro afeccionado, á vez que pretenden que os seus espectadores desconecten dos problemas mundanos a través dunha disciplina tan divertida como son as artes escénicas.