O grupo musical Añoranza (Pepe, Ramiro, Victorio, José, José Juan, Milucho e Moncho) formouse no ano 2000 motivado pola afección
de catro amigos pola música, despois de anos nos que nas sobremesas familiares e tamén nas reunións coas súas amizades nos furanchos nunca faltase a nota musical que eles mesmos lles poñían. Tanto era así que lles pediron actuar nunha romaría, polo que precisaban un nome artístico, e desde entón o de Añoranza os leva acompañando case dúas décadas.

Ao longo dos anos foron sumándose tres novos integrantes, esta vez vidos do mundo profesional, o que significou un empurrón tanto  para as súas propias traxectorias como para o sentimento común pola música dos membros orixinais. Participan en numerosos concertos en auditorios e festivais de música de toda a comarca, participaron no programa Luar da Televisión de Galicia e publicaron un álbum no que combinan cancións propias con outras  rescatadas do folk e de grupos do panorama musical galego, para renderlles un sentido  tributo a todas as persoas que están a traballar por que a nosa música siga viva.