Din que o número 13 trae consigo infortunios, pero o certo é que para o grupo de cantareiras Madialeva é a súa cifra da sorte. “Ducia e unha” foi o título do seu primeiro disco, bautizado con este nome por ser o número de integrantes do grupo no ano 2013. Xa choveu dende entón, algunhas cantareiras marcharon e outras novas foron chegando, pero sete anos despois seguen formando un grupo de 13 cantareiras. “É un misterio o que temos con este número porque renovámosnos varias veces pero ao final pola razón que sexa acabamos sendo 13. Fai pouco uníronse dúas novas mozas, pero xusto unha marchouse a traballar fora de Galicia e outra apartouse do grupo para centrarse na universidade” sinala a profesora de canto Merchi. Ela é a encargada de adornar ás voces deste grupo de mulleres de O Salnés.

O grupo naceu no ano 2010 froito da complicidade entre María Xosé, Loli e Susana. As tres mulleres de Meis escoitaban cantar ás súas nais dende moi pequenas e animaban as sobremesas coas súas fermosas voces. As súas pandeiretas daban vida ás calles máis próximas á Casa de Escudeiro en O Mosteiro, onde deleitaban aos veciños nas tardes de afonía do inverno sen luz. As veladas foron sumando máis voces e as mulleres decidiron formar un grupo de cantareiras que fusionase a tradición galega con letras frescas e pícaras. Elas mesmas son as encargadas de compoñer as súas propias cancións, pero tamén de versionar temas clásicos que levan ó seu terreo a través da retranca galega e os ritmos blues. A diferencia doutras pandereteiras, as Madialeva non cantan ao unísono, senón que misturan percusión tradicional coa polifonía para darlle diferentes tons.



 

A Casa de Escudeiro en O Mosteiro foi o centro neurálxico onde as cantareiras deleitaban aos veciños nas tardes de afonía do inverno sen luz

Nas primeiras actuacións tan só eran 6 ou 7 voces, pero foron sumando novas cantareiras procedentes doutras poboacións cercanas a comarca de O Salnés: Cambados, Curro, Sanxenxo etc. Sendo 13 integrantes decidiron sacar o seu primeiro disco, que tivo moita acollida grazas a repercusión conseguida polas súas visitas a programas de televisión como Luar, Bamboleo e Vin polo Vento. A día de hoxe, o grupo atópase inmerso nunha intensa axenda de concertos por toda Galicia. Auditorios, festas populares, festivais de música folk... ningún escenario se lle resiste a este grupo de mulleres que compatibilizan os seus respectivos traballos coa súa paixón pola música.