A meirande parte da infancia de José Manuel Acha transcorreu en Mozorín, en Baión. Preto de alí, no Sixto, foi onde naceu a Banda de Gaitas do Centro Cultural O Sixto, en 1981. Acha entrou a formar parte dela case por casualidade, por acompañar á súa prima e pola insistencia do seu avó, cando aos 12 anos. A partir dese momento, José Manuel Acha converteuse en autodidacta y tamén se seguiu formando en diferentes escolas, entre as que resaltan o Conservatorio Folque de Lalín (onde aprendeu a zanfona e a requinta), a Escola de Música de Vilagarcía (nela perfeccionou a frauta) e a Escola de Música de Caldas (saxo soprano). Tampouco lle faltaron as clases con grandes mestres de música, como Xaquín Xesteira ou Suso Vaamonde.

Non só recibiu clases de grandes mestres, senón que axiña se converteu el mesmo nun. De feito, con só 14 anos xa comezou a súa traxectoria como mestre ao ensinar aos seus amigos de Godos no grupo folclórico de Santa María. Non o debeu de facer moi mal cando dela saíu o grupo actual Maquia Gaiteiros. Ademais, e desde hai xa 31 anos, dá clases no grupo Santa Plácida de Rubianes.

O estilo da súa música é tradicional, con algúns toques de folk, e por iso cando fala das formacións polas que se sinte influído non pode deixar de nomear grupos como Os Campaneiros, Milladoiro, Os Irmáns Garceiras, Os Areeiras ou Os Amigos de Lugo. Non son nada máis que un reflexo da discografía que, durante a década dos anos 80, podía ter ao alcalde da súa man.

Ao longo de toda a súa traxectoria pertenceu a numerosas formacións como a Banda de Gaitas C. C. O Sixto, o grupo folclórico de Santa María de Godos (onde participou non só como mestre senón tamén como gaiteiro) ou a Orquestra de Instrumentos Populares Galegos Suso Vaamonde, tocando a zanfona, ademais de ter colaborado coa Banda municipal de Caldas de Reis. Tamén deixou a súa pegada nalgúns dos discos gravados polo cantautor Manoele de Felisa e polo pianista Juan Carlos Cambas.

José Manuel Acha tamén formou parte do proxecto musical Ballestrinque, xunto ao guitarrista arxentino Néstor Blanco, e do grupo ‘Aires da Terra, o legado de Feijoo’ que se creou expresamente para conmemorar o centenario da disolución do primeiro coro galego, Aires da Terra.

Pero non acaba aí a cousa, porque lle seguen os seus títulos de director de distintas bandas de gaitas como son a Mar de Arousa de Bamio, a Santa Plácida de Rubianes ou a Valle Inclán de Vilanova de Arousa. Tamén foi director e membro do grupo de gaitas Maquía, Gaiteiro de Godos e profesor de gaita e de percusión tradicional nas asociacións O Castro de Baión e na Asociación de Mulleres Rurais de Carracedo (Caldas).

Entre os seus obxectivos de futuro segue tendo moita importancia a súa faceta formativa, xa que quere seguir transmitindo o que aprendeu da música galega e conseguir que siga perdurando no tempo.