A Mónica Ferreirós entroulle o gusto pola fotografía cando era nena, ao atopar unha vella cámara Yashica na súa casa.  Estudou Fotografía Artística na Escola Mestre Mateo de Santiago de Compostela  entre as súas influencias atópanse Henri Cartier-Bresson, Robert Frank ou Cristina García Rodero.  

A súa fotografía céntrase no ámbito documental e xornalístico (de feito, foi galardoada en 2014 no certame de fotoxornalismo “Estaçao Imagem Mora”) e, polo tanto, gústalle que quen vexa as súas fotografías saiba sacar delas a información que quere ofrecer e busca retratar a realidade tal e como é.

Profesionalmente leva 19 anos dedicada case exclusivamente ao fotoxornalismo, malia que no eido persoal realizou varios traballos documentais e etnográficos e agora mesmo está a descubrir os retratos e a fotografía de natureza.

O seu obxectivo é poder seguir vivindo da súa profesión e continuar co seu proxecto educativo, “A Fotoescola”.