O Porto Deportivo de Portonovo é desde hai moitos anos o punto de partida para visitar un dos nosos maiores tesouros naturais: A Illa de Ons. A vinculación de Sanxenxo coa illa nace un par de séculos atrás, cando a configuración dos municipios modernos no século XIX adxudicou á localidade do Salnés a adscrición da illa por motivos de proximidade xeográfica.

Posteriormente pasou a formar parte do concello de Bueu por motivos sociais, posto que os antigos colonos insulares procedían da comarca de Morrazo, máis concretamente, do municipio de Bueu, onde a día de hoxe residen gran parte dos habitantes de Ons retornados a terra firme. A pesar deste cambio administrativo, a proximidade xeográfica mantivo intacta a conexión de Sanxenxo con Ons. A oferta de catamaráns e outras embarcacións que saen cada hora desde Sanxenxo é moi ampla, ofrecendo viaxes económicas e rápidas para visitar unha illa que forma parte do Parque Nacional das Illas Atlánticas.

Desta conexión tamén xurdiron distinas lendas, como a que recolle Álvaro das Casas no seu libro titulado “A Illa de Ons” sobre un tesouro escondido na illa. Segundo conta a lenda, un mariñeiro de Arousa escoitou a un mouro falar de valiosos tesouros. Coa mente posta en facerse cun bo botín, o arousán sonsaculle ao mouro a localización dun deses tesouros. O mouro confesoulle en segredo que nas profundidades da Illa de Ons había unha fonte repleta de caracoliños de ouro. O mariñeiro aproveitou unha mañá que volvía de pescar para recalar na illa e buscar a fonte. Alí estaba. Exactamente na mesma localización que o mouro lle dixera. O mariñeiro volveu a Arousa e esa mesma noite fretou unha dorna para volver á illa en busca dos caracoliños. Foi collendo e soprando dun en un ata que encheu a dorna que o converteu en millonario.