Vilaxoán é terra de mariñeiros e, ata hai poucos anos, estes mariñeiros que ían ou viñan do mar reuníanse nas tabernas do pobo. E mentres uns tomaban a perrita, xogando á brisca ou ao julepe, outros cantaban acompañándose de guitarras e bandurras que estaban penduradas das paredes das tabernas. Porque antes, en tódalas tabernas e bares de Vilaxoán había estes instrumentos colgados das paredes, á libre disposición de quen quixera tanguelos... O bar de Tuco, o Trompo Vivo, o Miramar de Florita, o de Juan Benigno... Mesmo na centenaria confraría de pescadores había unha boa rondalla de pulso e púa de fama comarcal.

Así xurdiron moitas cancións orixinais, autóctonas de Vilaxoán, especialmente habaneras, valses, baladas e cantigas de entroido. Dúas destas cancións podedes escoitalas enlazando neste enlace: https://youtu.be/7LMdZQGhKFg?is=QESxDnUzzLVMdpGu

A primeira é «Rula», e di así a letra:

RULA DA MIÑA IALMA 

Rula da miña ialma
meu caravel de amor
estrela da miña vidiña
ti ere-lo meu doce encanto
ti ere-la miña ilusión.

Por que non aprendes
dos meus cariños
doce estreliña
meu corazón.

Ti eres ruliña
dos meus encantos
quéroche tanto
morro de amor.

Ignoramos o nome de quen a compuxo, pero si hai xente maior en Vilaxoán que lembra que fora un barbeiro. Esta canción está gravada en vinilo pola Coral de Vilaxoán, dirixida por Máximo Patiño, que foi quen a harmonizou e adaptou para canto coral. Tamén está gravada en CD polo grupo Atlántica Vapora.

Da segunda canción, «Luz Divina», só atopamos unha gravación en CD, interpretada a dúas gaitas polos Terribles de Arousa e cantada polos homes da comparsa vilaxoanesa «Marajota e Media».

No enlace escoitarémola no festival «Vilaxoán Canta», na edición do ano 1995, dirixida por Máximo Patiño e con acompañamento de Salvador Cores «O Manso». Pincha aquí: https://youtu.be/SdF8MPTTOu8?is=RepR6ABdlgqeTISc