Os 50 nenos e nenas de entre 7 e 10 anos que participaron nos campamentos de verán Naturarte, organizados pola Concellería de Xuventude, viviron durante o verán unha emotiva xornada interxeracional na residencia de maiores Divina Pastora. A actividade permitiulles compartir unha mañá de música, baile, teatro e tradición coas persoas residentes. Esta xornada interxeracional adoita celebrarse todos os anos durante o verán e forma parte do programa de actividades dos campamentos de verán do Concello. O seu principal obxectivo é favorecer o encontro entre diferentes xeracións, estreitar os lazos entre os máis pequenos e as persoas maiores e fomentar valores como o respecto, a empatía e a convivencia. Ao mesmo tempo, constitúe unha oportunidade para que nenos e maiores compartan experiencias e coñecementos.

Durante a visita á residencia, a rapazada ofreceu un variado programa de actuacións que preparara con moita ilusión. Os residentes puideron gozar dunha divertida rolda de chistes, representacións teatrais, pequenas actuacións de circo, interpretacións musicais con violín e frauta e diferentes coreografías. Entre as actuacións destacou a tradicional Muiñeira de Chantada, que espertou a emoción de numerosos asistentes, así como diferentes bailes actuais inspirados no grupo surcoreano Katseye. Deste xeito, a xornada permitiu combinar elementos da cultura e da tradición galega cos gustos musicais e artísticos das novas xeracións.

Un dos momentos máis especiais foi o desenvolvemento dun proxecto de recuperación da memoria popular e reactivación cognitiva a través do refraneiro galego. Os nenos e nenas recompilaran previamente, coa colaboración das súas familias, numerosos refráns tradicionais que posteriormente compartiron cos residentes. Estes foron convidados a completalos, lembrar outros semellantes ou contar as súas propias experiencias relacionadas con esas expresións populares.

A actividade propiciou un enriquecedor intercambio de lembranzas e vivencias e contribuíu a poñer en valor o patrimonio oral galego, transmitido ao longo das xeracións. A mañá rematou nun ambiente de alegría, emoción e complicidade. As persoas maiores agradeceron o entusiasmo e a vitalidade dos máis pequenos, mentres que os participantes nos campamentos puideron coñecer de preto as experiencias e lembranzas doutra xeración. Con esta actividade, que se repite habitualmente cada verán dentro do programa dos campamentos Naturarte, se promove o encontro entre maiores e pequenos e crea un espazo no que compartir cultura, tradicións, aprendizaxes e momentos especiais.